पत्रकारितेतील गुणवंतांना गौरवाचा मान; अखिल भारतीय मराठी पत्रकार परिषदेकडून पुरस्कारांसाठी नावे मागविण्याचे आवाहन

पत्रकारितेतील गुणवंतांना गौरवाचा मान; अखिल भारतीय मराठी पत्रकार परिषदेकडून पुरस्कारांसाठी नावे मागविण्याचे आवाहन 

मुंबई :

       मुंबईत मे महिन्याच्या तिसऱ्या आठवड्यात होणाऱ्या अखिल भारतीय मराठी पत्रकार परिषदेच्या प्रतिष्ठित पुरस्कार सोहळ्याची तयारी सुरू झाली असून, विविध पुरस्कारांसाठी पात्र पत्रकारांची नावे ५ मेपर्यंत पाठविण्याचे आवाहन करण्यात आले आहे. 

     अखिल भारतीय मराठी पत्रकार परिषदेतर्फे दरवर्षी पत्रकारितेतील उल्लेखनीय कार्य करणाऱ्या मान्यवर पत्रकारांचा सन्मान विविध पुरस्कारांनी केला जातो. यंदाही या परंपरेनुसार पुरस्कार वितरण सोहळा मे महिन्याच्या तिसऱ्या आठवड्यात मुंबईत मान्यवरांच्या उपस्थितीत आयोजित करण्यात येणार असल्याची माहिती परिषदेचे मुख्य विश्वस्त एस. एम. देशमुख यांनी दिली. 

        या पुरस्कार सोहळ्यासाठी पात्र पत्रकारांची निवड प्रक्रिया सुरू झाली असून, विविध क्षेत्रांत उल्लेखनीय कामगिरी करणाऱ्या पत्रकारांचा गौरव करण्यात येणार आहे. परिषदेच्या वतीने २५ हजार रुपयांचा जीवनगौरव पुरस्कार दिला जातो. तसेच काही पुरस्कार परिषदेकडून दिले जातात, तर काही मान्यवरांनी ठेवलेल्या ठेवींच्या व्याजातून प्रदान केले जातात. 

       यंदा प्रथमच “रामशेठ ठाकूर सामाजिक कार्य कृतज्ञता पुरस्कार” सुरू करण्यात येत असून, हिंदी पत्रकारितेतील योगदान लक्षात घेऊन पत्रमहर्षी बाबूराव पराडकर यांच्या नावाने हिंदी पत्रकारिता पुरस्कारही सुरू करण्यात येणार आहे. याशिवाय मंगेश चिवटे यांनी ठेवलेल्या ठेवीतून त्यांच्या आजोबांच्या स्मरणार्थ एक विशेष पुरस्कार दिला जाणार आहे. 

        दरवर्षीप्रमाणे यंदाही सीमाभागातील एका मराठी पत्रकाराचा विशेष गौरव या सोहळ्यात करण्यात येणार आहे. परिषदेच्या पुरस्कारांची निवड प्रक्रिया पारदर्शक आणि गुणवत्ता आधारित असल्याने हे पुरस्कार कधीही वादग्रस्त ठरले नाहीत. त्यामुळे मराठी पत्रकारितेच्या क्षेत्रात या पुरस्कारांना विशेष प्रतिष्ठा प्राप्त झाली आहे. 

          या पुरस्कारांसाठी इच्छुक किंवा पात्र पत्रकारांची नावे सर्वांकडून मागविण्यात येत असून, पत्रकारितेत उल्लेखनीय कामगिरी करणाऱ्या व्यक्तींची शिफारस करण्याचे आवाहन करण्यात आले आहे. प्राप्त झालेल्या नामांकनांमधून निवड समिती अंतिम निवड करणार आहे. 

       नावे पाठविण्याची अंतिम तारीख ५ मे निश्चित करण्यात आली असून, अधिकाधिक योग्य उमेदवारांची नावे पुढे यावीत, असे आवाहन परिषदेच्या वतीने करण्यात आले आहे.