राज्यभरात ८,५०० पत्रकारांच्या आरोग्याची तपासणी
मराठी पत्रकार परिषदेच्या शिबिराचा सर्वत्र प्रतिसाद, संकल्पपूर्तीकडे वाटचाल
एस.एम.देशमुख यांनी मानले सर्वांचे आभार.
मुंबई :
मराठी पत्रकार परिषदेच्या ८५ व्या वर्धापन दिनानिमित्त आज रविवारी राज्यभरात विविध जिल्हे, तालुक्यांमध्ये "पत्रकार आरोग्य तपासणी शिबिरांचे" आयोजन करण्यात आले होते. या शिबिराला सर्वत्र चांगला प्रतिसाद मिळाला असून राज्यात तब्बल ८,५०० पत्रकारांची आरोग्य तपासणी करण्यात आली आहे. तर, काही जिल्ह्यांमध्ये पत्रकारांसाठी आरोग्य शिबिर हे पुढील तीन ते चार दिवसांमध्ये होणार आहे. त्यामुळे यंदाच्या वर्षी १० हजार पत्रकारांची आरोग्य तपासणी करण्याचा परिषदेने केलेला संकल्प नक्कीच पूर्ण होईल, असा विश्वास परिषदेचे मुख्य विश्वस्त एस.एम.देशमुख यांनी व्यक्त केला.
मराठी पत्रकार परिषदेची स्थापना ३ डिसेंबर १९३९ रोजी मुंबईत झाली. गेली दहा वर्षे परिषदेच्या वतीने ३ डिसेंबर हा दिवस राज्यात "पत्रकार आरोग्य तपासणी दिवस" म्हणून साजरा केला जातो. राज्यात ३६ जिल्हे आणि ३५४ तालुक्यात परिषदेच्या शाखा आहेत. यातील बहुसंख्य जिल्हे आणि तालुक्यात रविवारी आरोग्य तपासणी शिबिर घेण्यात आले. यामध्ये पुणे, अहमदनगर, नांदेड, गडचिरोली, रायगड, रत्नागिरी , धुळे, सातारा, कोल्हापूर, नागपूर, अकोले, परभणी, वाशिम , रत्नागिरी, नांदेड, हिंगोली यासह विविध जिल्ह्यांचा समावेश आहे. राज्यभर शिबिराला चांगला प्रतिसाद मिळाल असून तब्बल ८,५०० पत्रकारांच्या आरोग्याची तपासणी करण्यात आली. तर, राज्याच्या काही भागामध्ये पुढील तीन ते चार दिवसांमध्ये पत्रकारांसाठी आरोग्य शिबिराचे आयोजन करण्यात येणार आहे. त्यामुळे यावर्षी १० हजार पत्रकारांच्या आरोग्य तपासणी करण्याचा परिषदेने केलेला संकल्प नक्कीच पूर्ण होईल, असा विश्वास एस.एम.देशमुख यांनी व्यक्त केला.
राज्याच्या विविध भागात पत्रकारांसाठी आरोग्य तपासणी शिबिर यशस्वी केल्याबद्दल परिषदेचे मुख्य विश्वस्त एस.एम.देशमुख यांच्यासह विश्वस्त किरण नाईक, अध्यक्ष शरद पाबळे, कार्याध्यक्ष मिलिंद अष्टिवकर, सरचिटणीस मन्सूरभाई शेख, कोषाध्यक्ष विजय जोशी, राज्य प्रसिद्धीप्रमुख संदीप कुलकर्णी, सह प्रसिद्धीप्रमुख भरत निगडे, डिजिटल मीडिया परिषदेचे राज्य कार्याध्यक्ष अनिल वाघमारे, महिला आघाडी प्रमुख शोभा जयपूरकर यांनी सर्व जिल्हा पत्रकार संघ, तालुका पत्रकार संघाचे अभिनंदन केले आहे. तसेच मराठी पत्रकार परिषदेच्या वर्धापन दिनानिमित्त राज्यातील सर्व पत्रकारांना शुभेच्छा दिल्या आहेत.
डॉक्टर असलेल्या खासदारांनी स्वतः केली पत्रकारांची आरोग्य तपासणी
मराठी पत्रकार परिषदेच्या अहमदनगर जिल्हा शाखेने यंदा आरोग्य तपासणी शिबिरासोबतच मोफत नेत्र तपासणी शिबिराचे आयोजन केले होते. यावेळी पत्रकारांना नंबरचे चष्मे तसेच गॉगलचे मोफत वाटप करण्यात आले. जिल्हाध्यक्ष सूर्यकांत नेटके, डिजिटल मीडिया परिषदेचे आफताब शेख यांनी हे शिबिर यशस्वीतेसाठी परिश्रम घेतले. या शिबिराला खासदार डॉ.सुजय विखे पाटील, आमदार संग्राम जगताप यांनी भेट देत मराठी पत्रकार परिषदेच्या उपक्रमाचे कौतुक केले. तसेच डॉ.सुजय विखे यांनी स्वतः पत्रकारांची आरोग्य तपासणी करीत वर्धापनदिनानिमित्त अनोख्या शुभेच्छा दिल्या.
एस.एम.देशमुख यांनी बीड जिल्ह्यात वडवणी येथे तर अध्यक्ष शरद पाबळे यांनी पिंपरी चिंचवडमध्ये आणि सरचिटणीस मन्सूरभाई शेख यांनी नगरमध्ये आरोग्य तपासणी करवून घेतली. पुणे जिल्हा पत्रकार संघाचे अध्यक्ष सुनील लोणकर यांनी पुणे जिल्ह्यातील सर्व तालुक्यातील संघांचे नियोजन केले होते. तर पुरंदर तालुका संघाच्या सासवड येथील श्री. सोपानदेव हॉस्पिटलमध्ये आरोग्य तपासणी शिबिरत तपासणी करुन तालुक्यातील सदस्यांची तपासणी करून घेतली.
Posts
.jpeg)
