बाबुर्डी येथे MAHAVISTAR AI अॅपचे प्रात्यक्षिक मार्गदर्शन; शेतकऱ्यांचा उत्स्फूर्त प्रतिसाद
बारामती :
डिजिटल तंत्रज्ञानाच्या साहाय्याने शेती अधिक शाश्वत व लाभदायक व्हावी, या उद्देशाने कृषी विभागामार्फत बाबुर्डी (ता. बारामती) येथे कृषीदूतांच्या माध्यमातून कृषी खात्याच्या MAHAVISTAR AI अॅपचे सविस्तर मार्गदर्शन करण्यात आले. या उपक्रमाला शेतकरी व ग्रामस्थांचा उत्स्फूर्त प्रतिसाद लाभला.
कृषी विभागाच्या वतीने राबविण्यात येत असलेल्या आधुनिक तंत्रज्ञानाधारित उपक्रमांतर्गत बाबुर्डी गावात कृषीदूतांनी शेतकरी व ग्रामस्थांना कृषी खात्याच्या MAHAVISTAR AI अॅपचे सखोल मार्गदर्शन केले. बदलत्या हवामान परिस्थितीत आणि वाढत्या उत्पादन खर्चाच्या पार्श्वभूमीवर डिजिटल साधनांचा वापर करून शेती अधिक सक्षम करण्याचा हा प्रयत्न असल्याचे कृषीदूतांनी सांगितले.
या कार्यक्रमात MAHAVISTAR AI अॅपच्या माध्यमातून शेतकऱ्यांना पीक नियोजन, हवामान अंदाज, खत व्यवस्थापन, कीड व रोग नियंत्रण, बाजारभावाची अद्ययावत माहिती तसेच विविध शासकीय कृषी योजनांची माहिती कशी मिळवता येते, याचे प्रात्यक्षिकाद्वारे सविस्तर स्पष्टीकरण देण्यात आले. मोबाईलमध्ये अॅप कसे डाउनलोड करावे, नोंदणी प्रक्रिया कशी करावी व प्रत्यक्ष शेतीसाठी त्याचा वापर कसा करावा, याबाबतही कृषीदूतांनी मार्गदर्शन केले.
यावेळी उपस्थित शेतकऱ्यांनी अॅपविषयी विविध प्रश्न विचारून आपल्या शंकांचे निरसन करून घेतले. डिजिटल तंत्रज्ञानामुळे निर्णय घेणे अधिक सोपे होणार असून शेतीत उत्पादनवाढीसोबतच खर्चात बचत होण्यास मदत होईल, अशी भावना अनेक शेतकऱ्यांनी व्यक्त केली.
कृषीदूतांनी शेतकऱ्यांनी MAHAVISTAR AI अॅपचा नियमित वापर करून आधुनिक शेतीकडे वाटचाल करावी, तसेच शासकीय योजनांचा लाभ घेण्यासाठी या अॅपचा प्रभावी वापर करावा, असे आवाहन केले.
या कार्यक्रमासाठी गावातील शेतकरी, युवक व ग्रामस्थ मोठ्या संख्येने उपस्थित होते. या उपक्रमात सुरज मुळे, अभय धुमाळ, ताहीर तांबोळी, चैतन्य तुपे, शुभम धुमाळ, विश्वविजय मिसाळ तसेच कृषीसेवक दिलीप यादव यांनी मार्गदर्शन केले. या उपक्रमामुळे बाबुर्डी गावातील शेतकऱ्यांना आधुनिक कृषी तंत्रज्ञानाची ओळख मिळाल्याने समाधान व्यक्त
करण्यात आले.
No comments:
Post a Comment