उत्कृष्ट पत्रकार पुरस्काराने सन्मानित; सुनील लोणकर यांचा गौरव

By Bharat nigade - December 07, 2025

पुणे :

निळू फुले सभागृह, राष्ट्र सेवा दल, साने गुरुजी स्मारक, पर्वती पायथा येथे आयोजित कार्यक्रमामध्ये शिक्षक शिक्षकेतर संघटनेतर्फे उत्कृष्ट पत्रकार पुरस्काराने पत्रकार सुनील लोणकर यांचा गौरव करण्यात आला. ज्येष्ठ नेते उल्हासदादा पवार यांच्या हस्ते पुरस्कार प्रदान करण्यात आला. शिक्षण क्षेत्रातील मान्यवरांची उपस्थिती लाभलेल्या या सोहळ्यात विविध माध्यमांतून लोणकर यांच्यावर अभिनंदनाचा वर्षाव झाला.

या सन्मानाबद्दल कृतज्ञता व्यक्त करताना सुनील लोणकर यांनी आपल्या शिक्षकी संघटनांवरील वृत्तसंकलनाच्या दीर्घ योगदानाची आठवण करून दिली. अनेक वर्षे शिक्षक व शिक्षकेतर संघटनांचे प्रश्न, समस्या आणि गौरवकार्यक्रम समाजासमोर प्रामाणिकपणे मांडण्याचा प्रयत्न केला असून, त्या सेवेला मिळालेलं हे मोलाचं फळ असल्याचे त्यांनी सांगितले.

परिसराशी असलेला भावनिक दुवाही त्यांनी व्यक्त केला. महाविद्यालयीन शिक्षण याच परिसरात पूर्ण झाल्याने अनेक वर्षांनी पुन्हा या ठिकाणचा फेरभेट अनुभव भावुक करणारा ठरल्याचे त्यांनी नमूद केले.

कार्यक्रमाचे प्रमुख मार्गदर्शक शिवाजीराव खांडेकर सर, तसेच आयोजक सहकाऱ्यांचे त्यांनी मनःपूर्वक आभार मानले. “सर्वांनी केलेल्या प्रेम, शुभेच्छा आणि विश्वासामुळेच हा सन्मान अधिक विशेष झाला,” अशा शब्दांत त्यांनी सर्वांचे आभार व्यक्त केले.