नीरा येथील ज्येष्ठ नागरिक निर्मला तेजमल जैन यांचे निधन : मरनोत्तर नेत्रदान करून मानवतेची सेवा

 नीरा येथील ज्येष्ठ नागरिक निर्मला तेजमल जैन यांचे निधन : मरनोत्तर नेत्रदान करून मानवतेची सेवा 

नीरा (ता. पुरंदर) : नीरा शहरातील ज्येष्ठ नागरिक आणि आदरणीय व्यक्तिमत्त्व म्हणून ओळखल्या जाणाऱ्या निर्मला तेजमल जैन (वय ८२) यांचे नुकतेच निधन झाले. त्यांच्या निधनाने नीरा परिसरात हळहळ व्यक्त केली जात आहे. शांत, संयमी स्वभाव, कुटुंबाबद्दलची निस्सीम निष्ठा आणि सामाजिक जाण या गुणांमुळे त्या परिसरात सर्वश्रुत होत्या. 

         निर्मला जैन यांनी आपल्या आयुष्यात कुटुंब एकत्र ठेवण्याचे कार्य जपले. त्यांच्या पश्चात तीन मुले, सुना तसेच नातवंडे असा मोठा परिवार आहे. कुटुंबातील सर्व सदस्यांवर त्यांचा मायेचा आणि अनुशासनाचा हात सदैव राहिला. नीरा येथील दिनेश मेडिकलचे मालक नरेंद्र जैन तसेच संतोष जैन व दिनेश जैन यांच्या त्या मातोश्री होत. 

          विशेष म्हणजे, आपल्या जीवनातील परोपकारी वृत्तीचे दर्शन देत त्यांच्या कुटुंबीयांनी मातोश्रींचे नेत्रदान करण्याचा निर्णय घेतला. त्यामुळे दोन व्यक्तींना नवे प्रकाशमान आयुष्य मिळणार आहे. नेत्रदान हा मानवतेचा सर्वोच्च आदर्श मानला जातो आणि जैन कुटुंबाने त्याची कर्तव्यदक्षपणे अंमलबजावणी केली याबद्दल सर्वत्र कौतुक होत आहे. 

           निर्मला जैन यांचा सौम्य, स्नेहपूर्ण आणि जिव्हाळ्याचा स्वभावामुळे त्यांचे मित्रपरिवार, नातेवाईक आणि शेजारी त्यांना विशेष प्रेम करीत. त्यांच्या निधनाने नीरा शहरात एक पोकळी निर्माण झाली आहे. अंत्यसंस्कार त्यांच्या नीरा गावी धार्मिक विधीनुसार करण्यात आले. अंत्यसंस्कारासाठी नीरा मेडिकल असोसिएशनचे सर्व डॉक्टर, केमिस्ट असोसिएशनचे सर्व सदस्य, ग्रामपंचायतीचे सरपंच, उपसरपंच, सदस्य, राजकीय, सामाजिक, शैक्षणीक, धार्मीक, पत्रकारीता, क्रिडा क्षेत्रातील मान्यवर उपस्थित होते. 

त्यांच्या स्मृतीस विनम्र अभिवादन. 

ओम शांती..